Í seinastuni hava fleiri miðlar og altjóða kanningar víst á, at islam er trúgvin, sum veksur skjótast í heiminum. Henda gongdin er eisini ávirkað av fjølbroyttum samfelagsligum og demografiskum orsøkum. Kristindómurin er framvegis heimsins størsta trúgv, men í vøkstri er tað islam, ið hevur størsta vøkstur.

Tølini tala

Sambært granskingum, fer talið av muslimum at vaksa skjótari enn nakað annað trúarsamfelag í komandi áratíggju. Talið av muslimum fer væntandi at vaksa umleið 70% til 2060, samanborið við ein vøkstur á 34% fyri kristin.

Orsøkirnar til hesa gongd eru fleiri. Muslimar eiga í miðal fleiri børn enn kristin og onnur trúarsamfeløg. Harumframt hava nógv muslimsk lond mong ung, meðan mong vesturlond – har kristindómurin er mest útbreiddur – hava øðrvísi og eldri fólkasamanseting og lægri burðartøl.

Umvending og trúgv

Eitt annað áhugavert evni er umvending. Í vesturheiminum eru nógv dømi um kristin, ið venda kristnu trúnni bakið, ella velja at lýsa seg sum gudloysingar. Hinvegin síggja vit eisini dømi um fólk, ið venda um til islam, serliga í Evropa og USA. Orsøkirnar eru fjølbroyttar – alt frá andaligari leitan til sosiala og mentanarligt tilknýti.

Politiskar og mentanarligar avleiðingar

Vøksturin í muslimska fólkatalinum hevur eisini við sær spurningar og kjak í mongum samfeløgum, serliga í Evropa, har integratión, trúarfrælsi og samfelagsligar broytingar eru evnir, sum ofta eru á dagsskránni. Tað er týdningarmikið at skilja, at trúgv og mentan eru tætt knýtt – og vøksturin í einum trúarsamfelag kann hava djúpar avleiðingar fyri framtíðar mentanarliga landslagið í einum landi.

Kristindómurin stendur framvegis sterkur

Hóast kristindómurin ikki veksur eins skjótt sum islam, hevur kristindómurin framvegis ein sera stóran leiklut í mongum londum. Eisini síggja vit ein vøkstur í evangeliskum og karismatiskum kirkjunum í Afrika og Suðuramerika, har kristindómurin stendur sterkur.

Ein heimur í broyting

Vøksturin av islam sigur okkum ikki bert nakað um trúgv, men eisini um, hvussu heimurin er í ferð við at broytast. Globaliseraður flutningur av fólki, broytt familjumynstur og vaksandi tal av ungdómi í nógvum muslimskum londum gera, at islam fer at hava enn størri leiklut á altjóða pallinum.

Vit kristnu vita, at tað er Gud sum gevur vøkstur. Men tað er ein sannroynd, at versliggering, líkasæla og væntandi ídni, hevur merkt okkum kristnu í vesturheiminum, í mong, mong ár.

Lat okkum biðja hesa bøn:

Gev mær títt eyma kærleikssinn 
um sorg og harm í verð!
Leið meg í pínslu tína inn,
meg styrk, meg ídnan ger!
Meg síggja lat við tínum brá 
hvørt fólk, tú lív og mark lætst fá, 
og tola heimsins neyðarstand, 
fast lítandi at tær, Guds lamb,
til deyðans dag
í treystum, tolnum lag!