Kirkjuliga Heimamissiónin skipar framvegis fyri tiltakinum SAMAN UM BÍBLIUNA, sum er ein lítil bíbliuskúli, har øll eru vælkomin at taka lut. Endamálið er at koma djúpri inn í Guds orð og at styrkja felagsskapin um Bíbliuna.

Komandi mikukvøld 4. mars kl. 19.30 verður triðja undirvísingarkvøldið. Tá fer Heri Kjærbo at undirvísa undir yvirskriftini: “Ver tann tú í Kristi ert – har tú ert.”

Kvøldið verður í Meinigheitshúsinum í Havn. Umframt undirvísing verður eisini bólkaprát út frá evninum, og endað verður við drekkamunni.

Fyrstu tvey kvøldini hava verið væl vitjaði. Tann 14. januar í Klaksvík undirvísti Símun Persson Jacobsen um rættvísgering, og 4. februar á Skála undirvísti Carsten Fonsdal Mikkelsen um sambandið millum trúgv, gerningar og frelsu.

Upptøkurnar frá kvøldunum higartil eru tøkar at hoyra her á síðuni, og tær kunnu eisini hoyrast á ymiskum poddvarps tænastum, eitt nú á Spotify.

Tað er ikki neyðugt at hava hoyrt fyrru undirvísingarnar fyri at taka lut – øll kvøldini kunnu standa fyri seg sjálv.

Øll eru hjartaliga vælkomin til eitt gevandi og uppbyggjandi kvøld í Meinigheitshúsinum í Havn. Bæði tú, sum hevur verið við fyrr, og tú, sum kemur á fyrsta sinni.

Spotify: