Bønavikan, ‘National Week of Prayer’, verður hildin frá 6. til 14. septembur 2025.

Kristin úr ymiskum kirkjusamfeløgum savnast tá til bøn fyri tjóðini, og tiltakið fær eisini stuðul frá heimskenda ævintýraranum og sjónvarpsstjørnini Bear Grylls.

Verkætlanarleiðarin Kam Flynn sigur við ‘Christian Today’, at tvær milliónir fleiri fólk ganga í kirkju í Bretlandi nú, enn fyri seks árum síðan – eitt tekin um, at andalig veking er á veg.

Bear Grylls hevur altíð verið púra opin um sína kristnu trúgv, sum hann kallar grundvøllurin í lívinum.

Edward Michael Grylls, vanliga nevndur «Bear», er ein bretskur ævintýrari, rithøvundur, sjónvarpsvertur og fyrrverandi hermaður. 51 ára gamli Grylls er m.a. kendur fyri sendingina ‘Man vs. Wild’. Hann var ein av teimum yngstu bretum, ið hava rokkið toppin á Mount Everest, tá ið hann 26. mai 1998, sum 23 ára gamal, stóð ovast á hægsta fjalli í heiminum. Í 2019 varð hann sligin til stórmeistara í ‘Order of the British Empire (OBE)’ fyri arbeiði sítt fyri ungdómin, í miðlum og í vælgerðararbeiði.

– Tú kanst ikki taka Gud burtur úr veruleikanum. Hann er allastaðni, og vit kunnu hoyra hann, um vit bara eru still og lurta eftir honum, skrivar Bear Grylls í einum av bókum sínum.

Í fleiri ár, fram til í fjør, var hann ovasti leiðari fyri bretsku skótarørsluna, ‘The Scout Association’. Nú stuðlar hann eisini bønavikuna, sum byrjar fyrsta dagin.

Í sambandi við bønavikuna, sigur hann: – Lívið er fult av stríði og strevi, men hjálp og styrki byrjar á knøunum. Bøn er eitt opið hjarta og ein samtala við skaparan, sigur Bear.

Bønavikan fevnir bæði um netfundir og gudstænastur kring alt landið. Serliga verður biðið fyri stjórnini, skúlum, neyðtænastum, ungdómi og kirkjuni sjálvari.

Felagsskapir sum ‘Hope Together’ og fleiri aðrir kristnir felagsskapir, m.a. løgreglu- og bjargingarfeløg, taka lut í bønavikuni..

Endamálið er, at biðja um andaliga endurnýggjan og eina sjónliga kristna veking í Bretlandi, skrivar Christian Today.