– Tað eru helst fleiri enn tey, vit hava skjalfest, verður sagt í nýggjari frágreiðing.

Ein nýggj kanning frá amerikanska greiningarstovninum ‘Africa Center for Strategic Studies (ACSS)’ vísir, at harðskapurin frá hernaðarligum islamiskum bólkum er øktur munandi móti kristnum í Afrika.

Tað skrivar ‘Premier Christian News’.

– Harðskapurin í Sahel er helst størri enn tað, vit hava skjalfest, verður sagt í frágreiðingini, sum vísir á, at hernaðarstýrdir miðlar avmarka atgongd frá óheftum miðlum.

Jihadistisk stýri

Meira enn 80 prosent av drápunum í Sahel verða sett í samband við jihadistanetverkið ‘Jama’at Nusrat ul-Islam wa al-Muslimin (JNIM)’, sum nú hevur ræðið á meira enn helvtini av Burkina Faso.

Í Somalia hevur yvirgangsbólkurin Al-Shabaab staðið aftan fyri meira enn 6.000 dráp seinasta árið, samstundis sum ‘Islamic State in Somalia (ISS)’ hevur fingið størri ávirkan og virkar sum ein altjóða samskipandi miðdepil fyri IS-rørsluna.

Eisini í Eystur-Kongo er harðskapurin versnaður. Har tók ein IS-bólkur, Allied Democratic Forces, alla ábyrgdina fyri eitt ógvusligt álop á eina kirkju, har 43 fólk vórðu dripin undir eini náttargudstænastu.