Fyrst í september var eitt øðrvísi tiltak í Fríðrikskirkjuni á Toftum. Tá lósu ein kvinna og ein maður upp á skift allar 16 kapittlarnar í Evangeliiunum eftir Markus. Tiltakið eydnaðist so mikið væl, at nú verður alt Jóhannesevangeliið lisið upp í hini stóru kirkjuni í prestagjaldinum, sum er Gøtu kirkja.

Hóskvøldið klokkan 19 verður Evangeliið eftir Jóhannes lisið upp í Gøtu kirkju. Tað eru tríggir lesarar, sum hava fingið sjey kapittlar hvør og sum seinastu tíðina líkasum hava nærlisið og tilogna sær tekstin. Tað verða tveir steðgir, og tiltakið er væntandi liðugt um tíggju-tíðina.

Seinast, líknandi tiltak var, segði Ovi Brim, sóknarprestur í Nes prestagjaldi, at endamálið millum annað var at síggja ta stóru heildina og samanhangin, sum teir einstøku tekstirnir eru skrivaðir í.