Móttøka á Blákrossheiminum í dag

Í dag, fríggjadag, klokkan 15 verður almenn móttøka á Blákrossheiminum á Nesi fyri Olgu Magnussen, fráfarandi leiðara, og Jüttu Olsen, komandi leiðara.

Í tíðindaskrivi sigur Blái Krossur Føroya, at Olga Magnussen hevur verið ein trúfastur leiðari á Blákrossheiminum í 18 ár. Í 2001 var hon sett sum leiðari á Blákrossheiminum, sum tá var í Lynggøtu 12 í Tórshavn. Har var hon leiðari í 13 ár, áðrenn stovnurin flutti inn á Nes. Olga var við í tilgongdini at sniðgeva og innrætta nýggja Blákrossheimið, sum læt upp í 2014. Olga hevur eisini verið við til at menna viðgerðartilboðið til tað, tað er nú.

Umframt at leiða Blákrossheimið hevur Olga verið sera virkin í altjóða felagsskapinum ‘Blue Cross International’ og arbeitt fyri, at Føroyar stuðla felagsskapinum í arbeiði teirra.

Jütta Olsen er útbúgvin sjúkrarøktarfrøðingur og hevur verið í starvi sum varaleiðari á Blákrossheiminum í 10 ár. Undanfarna árið hevur hon verið leiðari, meðan Olga hevur verið í farloyvi.

LES EISINI  Poddkast: Blái Krossur vil eisini taka hond um børnini

Umframt tann stuðul, Jütta hevur víst Olgu, ta tíð, hon hevur verið varaleiðari, hevur hon eisini verið við frá byrjan við arbeiðinum ‘DAT UNG’ – viðgerðartilboð til ung – og ment tað, soleiðis at tað nú er ein viðurkend viðgerð í Føroyum. Les meira um ‘DAT UNG’ her.

Móttøkan verður í dag 30. august klokkan 15 til 18 á Blákrossheiminum á Nesi. Blái Krossur vil takka Olgu Magnussen fyri tað arbeiði, hon hevur gjørt fyri felagsskapin, og alment seta Jüttu Olsen í starv sum nýggjan leiðara á Blákrossheiminum á Nesi.

Øll eru hjartaliga vælkomin.

Spurningar
Í løtuni eru ikki spurningar til greinina