Leygardagin tann 26. oktober 2024 kl. 14:00 verður temadagur í Meinigheitshúsinum í Havn.

Hetta er partur av Stórmøtunum. Tiltakið hevur til endamáls at hjálpa luttakarunum at umseta sína trúgv til praksis og finna tíð til bøn í einum trongum gerandisdegi.

Trúboðarin Carsten Fonsdal Mikkelsen, sum hevur verið við í fyrireikingunum, sigur, at temadagurin er ein góður møguleiki at styrkja persónliga sambandið hjá luttakarunum við Gud í gerandisdegnum.

“Fyrst og fremst fáa vit møguleika at fegnast um, at vit eru skapað til at liva saman við Gudi,” sigur Carsten Fonsdal Mikkelsen.

Hann greiðir frá, at menniskjan av lyndi trívist best í Guds nærveru. “Stutt sagt, so virka vit best í hansara nærveru. Gud ynskir eisini at vera saman við okkum. Tá vit ikki kunnu koma til hansara, valdi hann sjálvur at stíga niður á jørðina og gerast menniskja.”

Fatanin av Gudi sum ein nærverandi og lívgevandi Gud liggur til grund fyri arbeiðinum hjá Kirkjuligu Heimamissiónini. Heimamissiónin hevur altíð verið ein “bønarrørsla,” har bøn ikki bara verður sædd sum ein skylda, men sum eitt lívgevandi og neyðugt samband við Gud.

Kortini uppliva mong trúgvandi, at hóast vit fegin vilja, kann tað vera trupult at raðfesta tíð til Gud í einum skundmiklum gerandisdegi.

“Vit í Heimamissiónini  ynskja at vera í sambandi við Gud og liva saman við honum í gerandisdegnum. Men vit eru eisini ávirkað av eini skundmiklum gerandisdegi, har okkara góðu ætlanir ikki altíð verða umsettar í verki,” viðgongur Carsten Fonsdal Mikkelsen. Tað er júst hendan avbjóðingin, sum temadagurin skal hjálpa luttakarunum við.

Tvey ymisk spor

Temadagurin er býttur í tvey spor, sum luttakararnir kunnu velja ímillum eftir áhuga.

Annað tiltakið er eitt pallborðskjak, sum setir fokus á bøn í einum skundmiklum gerandisdegi. Pallborðið er mannað við fólki í ymiskum aldri og royndum. Tey fara at deila sínar persónligu royndir við at finna tíð til bøn og samveru við Gud hóast avbjóðingar, sum gerandisdagurin kann hava við sær.

“Vit hava valt at gera hesi bæði tiltøkini, har vit kunnu skifta orð um hugskot og royndir, hvussu vit kunnu skapa meira pláss til dagliga samveru við Gud,” greiðir Carsten Fonsdal Mikkelsen frá. Hann leggur dent á, at kjakið er ein serligur møguleiki at fáa innlit í ymiskar hættir at biðja og praktisera andaliga lívið frá fólki og undir ymiskum umstøðum.

Pallborðið byrjar við tveimum framløgum, har Dagny Højgaard og Tóta Akursmørk fara at deila sínar royndir við bøn. Eftir hetta verður kjak, har luttakararnir fáa møguleika at seta spurningar og deila sínar egnu royndir,” sigur Carsten Fonsdal Mikkelsen.

Praktisk vegleiðing í bøn og fyriskipan

Hitt sporið, sum luttakararnir kunnu velja, er ein meira praktisk verkstova, har arbeitt verður við at gera eina persónliga ætlan fyri bøn og  umhugsan. Hetta tiltakið verður leitt av Tórhild Bjarkhamar.

“Samtíðis hava vit eitt annað tiltak, har møguleiki er at arbeiða meira ítøkiligt við eini ætlan fyri, hvussu mann sjálvur ætlar at finna meira pláss til samveru við Gud komandi 8 dagarnar, sigur Carsten Fonsdal Mikkelsen. Her verður dentur lagdur á samtalur í smáum bólkum, har luttakararnir kunnu kjakast um sínar avbjóðingar og finna loysnir. Eftir bólkasamrøðurnar fer hvør luttakari at gera eina persónliga bønarskrá fyri komandi átta dagarnar. Hetta gevur teimum ítøkilig amboð til at finna tíð til Gud í gerandisdegnum.

“Tórhild Bjarkhamar hevur játtað at leiða hetta tiltak. Samveran við Gud er nakað, sum hevur stóran týdning fyri hana, og vit vita, at hon við sínum royndum og brennandi áhuga fyri evninum kann lata upp fyri vitan og eggjan til bøn,” sigur Carsten Fonsdal Mikkelsen.

At umseta trúnna til praksis

Endamálið við temadegnum er at geva luttakarunum amboð og íblástur til at umseta trúnna í praksis. Gud ynskir at hava samband við okkum øll, men tað krevur, at vit finna tíð til hetta samband í okkara dagligdegi. “Tí hava vit valt at gera hesi bæði tiltøkini, har vit kunnu skifta orð um hugskot og royndir, og hvussu vit kunnu skapa meira pláss til dagliga samveru við Gud.”

Carsten Fonsdal Mikkelsen vónar, at temadagurin verður ein møguleiki fyri mong at taka nýggj fet á teirra trúarleið og finna hættir at liva í tættari samveru við Gud í gerandisdegnum.