Løgdu eini boð eftir seg: «Tú, vantrúgvandi, fert at møta Allah í dóminum».

Ein evangelistur, sum hevði leitt fleiri muslimar til kristna trúgv, undir einum uttandura tiltaki í Nairobi, Kenya, varð myrdur av islamistum seinasta mánað.

Hetta skrivar ‘Morning Star News’, ‘East News Uganda’ og ‘Christian Post’.

3. apríl varð David Washume stungin við knívi, tá ið hann var á veg heim, eftir at hava talað í trý samdøgur í Nalondo, Buwalasi. Evangelisturin, sum doyði av løstunum, var 38 ára gamal.

Bíbliuvers og koranvers

Sambært tíðindamiðlinum, segði ein kelda, at meðan Washume talaði, samanbar hann vers úr Koranini og Bíbliuni. Hann legði dent á guddómligu støðu Kristusar og samanbar við mannin Mohammed.

Triðja dagin komu fleiri fólk at lurta eftir evangelistinum, sum var saman við starvsfelaganum Fred Wepuhulu.

– Hann bað tey taka støðu, venda syndini bakið og venda sær til Kristus. Mong tóku ímóti gleðiboðskapinum og lovprísaðu Gudi.

Eisini muslimar

Fleiri muslimar tóku ímóti Jesusi sum Harra og Frelsara. Nakrir muslimar mótmæltu harðliga, og teir báðir evangelistarnir fóru inn í húsini hjá einum vinmanni undan ófriðinum. Teir vórðu álopnir, tá ið teir vóru á veg heim 3. apríl umleið kl. 22.

Fred Wepuhulu segði við Morning Star News, at teir møttu trimum monnum við maskum, í muslimskum klæðum, við knívum og teir tosaðu arábiskt.

– Teir steðgaðu okkum og kravdu, at vit skuldu geva teimum taskurnar, segði hann og legði afturat, at ránsmenninir funnu bæði Bíbliur og eina Koran í taskuni hjá Washume.

Tað eru teir

Wepuhulu, sum bardist við annan mannin, megnaði at rýma. Tað gjørdi Washume ikki, tí hann varð hildin av tveimum monnum í muslimskum klæðum.

– Ein teirra rópti á okkara staðbundna máli: «Tað eru teir, tað eru teir… drep, drep teir», segði Wepuhulu og legði afturat, at tað ljóðaði, sum teir vóru av teimum harðrendu islamistunum.

Eitt skyldfólk hjá Washume, segði, at líkið hevði sár á hálsinum og bringuni.

– Knívurin, ið varð brúktur til at drepa hann við, varð funnin á staðnum, saman við einum pappírslepa, har skrivað stóð: «Tú vantrúgvandi, fert at møta Allah í dóminum» og nøkrum øðrum óskiljandi orðum á arábiskum, segði skyldfólkið.

Sambært Moses Kutosi, vinur hins deyða og tann sum boðaði politinum frá, var Washume ein góður, arbeiðssamur og trúfastur kristin. Hann var limur í eini ikki skrásettari kirkju í býnum Mbale.

Løgreglan er farin at leita eftir drápsmonnunum, upplýsir tíðindamiðilin, og leggur afturat, at hetta álopið er eitt av mongum dømum um atsókn av kristnum í landinum.

Góðu brøður og systrar í Harranum! Minnist til at biðja fyri teimum, sum vera forfylgd, pínd og dripin vegna sína trúgv á Jesus Kristus.