Sum liður í 2030 strategiini hjá Heimamissiónini er avtala gjørd við Andrias Garðsá og Magnus Hammer í Hjøllum um at arbeiða sum volontørar í Íslandi í eitt hálvt ár

Í summar undirskrivaðu Kirkjuliga Heimamissónin og systurrørslan í Íslandi, Kristniboðsambandið, samstarvsavtalu, sum hevur til endamáls at styrkja missiónsarbeiðið í og útfrá londunum í útnorðri.

Avtalan bleiv gjørd sum liður í 2030 strategiini hjá Heimamissiónini, har eitt av málunum er at seta meira fokus á missiónsarbeiði í útnorðri. Avtalan fevndi um ymisk øki, sum rørslurnar ynskja at samstarva um, eitt nú ungdómsarbeiði. Og nú er fyrsta stóra átakið sett í verk, tí fyrst í komandi ári fara teir báðir Andrias Garðsá úr Havn og Magnus Hammer í Hjøllum av Toftum til Íslands at arbeiða sum volontørar.

Hóast ungir, so hava báðir longu hollar royndir innan volontørarbeiði. Andrias arbeiðir í løtuni sum volontør innan ungdómsarbeiðið hjá Heimamissiónini, og hetta hevur hann gjørt í knappliga hálvt ár, har hann millum annað framleiðir HMU-podcastin. Magnus hevur í vár arbeitt eitt hálvt ár í Grønlandi sum volontør hjá donsku sjómansmissiónini, og samrøða er gjørd við hann um hetta, sum kann síggjast her.

Andrias og Magnus fara til Íslands fyrst í 2026, og koma teir at arbeiða fyri Kristniboðsambandið við arbeiðsstaði í Reykjavík. Høvuðsuppgávan hjá teimum verður at styrkja ungdómsarbeiðið hjá SÍK.

Kundi tú hugsa tær at arbeitt sum volontørur hjá Kirkjuligu Heimamissiónini ella hjálpt til á annan hátt, kanst tú skriva aðalskrivaran á jakup@mission.fo.