Fosturtøkur kostaðu 42 milliónum lívið í 2018

Á heimsstigi vórðu gjørdar umleið 41,95 milliónir fosturtøkur í 2018. Tað upplýsti felagsskapurin Worldometers tann 31. desember. Hagtølini eru bygd á upplýsingar frá heimsheilsustovninum WHO.

Heimasíðan Christian Daily Reporter hevur almannakunngjørt tølini. Samanborið við hagtøl frá øðrum deyðsorsøkum kann staðfestast, at fosturtøka krevur fleiri mannalív enn bæði krabbamein, malaria, HIV/Aids, royking, rúsdrekka og ferðsluvanlukkur. Í 2018 doyðu 8,2 milliónir fólk av krabbameini, og 1,7 milliónir doyðu av HIV/Aids.

Færri fosturtøkur í USA

Talið á fosturtøkum í USA er minkandi sambært seinastu hagtølunum frá Centers for Disease Control and Prevention, sum brúkar eina uppgerð frá november 2015.
Her sæst, at tað vórðu gjørdar 638.169 fosturtøkur í 49 statum í 2015. Kvinnur í aldrinum 20 til 24 ár fingu flestu fosturtøkurnar gjørdar, men tað var stórt fall í talinum hjá tannáringum millum 15 og 19 ár samanborið við tølini frá 2006.
– Hetta er í stóran mun orsakað av eini ‘fyri-lívi’ lóggávu, sum roynir at vísa á alternativ til fosturtøku og at undirvísa um avleiðingarnar av fosturtøku og at ófødda barnið er eitt menniskja, sigur Carol Tobias, leiðari í The National Right to Life Committee.
Rachel Jones, sum er granskari á Guttmacher Institute, vísir tó á, at eisini bíligari fyribyrging og lættari atgongd til húskisráðgeving eru millum orsøkirnar til, at tað verða skrásettar færri fosturtøkur.

LES EISINI  Miðskeiðsvalið í USA: Tveir statir táttaðu í møguleikan at fáa fosturtøku

 

Kelda: Udfordringen