– Lærið av mær, segði Jesus einaferð við sínar lærusveinar.

Tað merkir, at Jesus hevur nakað at læra okkum í teimum ymisku støðunum, sum vit møta í lívinum. Eisini tá ið tað er um okkara bønarlív, hevur Jesus nakað at læra okkum:

– Hvussu bað Jesus?
– Hvat kunnu vit læra av Jesusi um tað at biðja?

Jesus brúkti bønina sum samrøðu í trúnaði við sín faðir.

– Faðir! Soleiðis vendir Jesus sær til Guds. Í trúnaði, nær og beinleiðis. Bønin var staðið, har Jesus varðar um nærsambandið við sín himmalska faðir. Bønin lýsti kærleikaviðurskiftini, sum vóru teirra millum. Í bønini hevði Jesus samfelag í trúnaði við sín faðir. Við at tosa, og við at lurta.

Eisini tær og mær tørvar eitt tílíkt samfelag í trúnaði við Gud. Møguleikarnir eru okkum givnir í bønini.

Jesus gav sær altíð stundir til bøn.

Jesus hevði ofta úr at gera. Men ongantíð so nógv, at tað tarnaði bønarlívinum. Bíblian fortelur, at Jesus ofta fór burturfrá, í stilli, har hann kundi vera í einingi. Hann fór avstað fyri at biðja. Av og á tók hann eisini sínar lærusveinar við sær, tá ið teir høvdu nógv at gera. Maktaðir lærusveinar fingu hjálp frá Jesusi til stilli og bøn.

Eisini vit hava brúk fyri bønini. Sum hvíldarstað í tænastuni, og orkustøð á himmalvegnum.

Jesus brúkti bøn í øllum lívsins umstøðum.

Í Bíbliuni síggja vit, at Jesus brúkti bøn í mongum ymiskum umstøðum. Við sjúkrasongina og við grøvina, í frálæru og boðan. Tá ið hann møtti svongum, bangnum og einsligum menniskjum. Bøn letur himmalin koma inn í støðuna. Eisini okkum tørvar himmalsamband í dagliga arbeiðnum, og himmalorku í tænastuni fyri Harran.

Jesus nýtti forbøn fyri øllum menniskjum.

Nógv sjálvgóðska er ikki at síggja hjá Jesusi. Umsorgan fyri øðrum menniskjum fylti alt hansara lív. Ofta vísti hettar seg í forbøn.
Ongantíð síggja vit tað greiðari enn í líðingarsøguni. Lætt er at hugsa, at nú hevði væl Jesus nóg mikið í sær sjálvum. Men ongantíð bað hann so nógv fyri øðrum sum tá.

– Á Oljufjallinum grætur hann um staðin.
– Í salinum, har halga kvøldmáltíðin varð hildin, biður hann fyri ivandi vinum.
– Í Getsemane sigur hann Pæturi um sítt bønarstríð.
– Á krossinum biður hann: – Faðir, fyrgev teimum, tí teir vita ikki, hvat teir gera.

Jesus nýtti forbønartænastuna. Tað eiga vit eisini gera!

Til umhugsanar

Jesus har bedt oss å lære
lære å ligne Guds Lam.
Ydmyk, saktmodig å være,
det skal jeg læra hos ham.
Skue hans åsyn så længe,
at jeg forvandles derved,
og at hans bilde kan trænge
dybt i mit hjerte seg ned.

H.A. Tandberg, 1910

Å, Jesus, ditt namn er det beste
av alt det, du syndaren gav.
I bøna hans fullkomne feste,
i døden hans kjepp og hans stav!

Nils Lavik, 1927 / Sangboken, Nr 395

Eftir Johnn R. Hardang (Noreg) í bókini “Veien” (Sambåndet Forlag 1998)

Hjørleif Poulsen týddi