+10

Um vikuskiftið var Leguhúsið í Nesvík karmur um eina av árligu legunum fyri sonevnda junioraldursbólkin (11-14 ára gomul). Legan er ikki meira enn eitt stórt samdøgur, men tað er gravgangur eftir at sleppa við, og nú er avgjørt, at tað verða tvær slíkar legur í mars næsta ár.

Tað vóru um 175 luttakarar á legu, umframt leiðarar og hjálparfólk, og tey fingu eitt stuttligt og gott samdøgur saman. Hesaferð vóru tað leirvíkingar við Kartin Høgnesen á odda, sum skipaðu fyri. Ábyrgdin fyri leguni skiftir millum tey ymsu juniorarbeiðini kring landið.

Tað hoyrist, tá næstan 200 børn/ung millum 11 og 14 ár eru saman, men tað var tó ikki so rokaligt sum í fjør, tá 280 vóru á legu. Fleiri bygdir vóru ikki umboðaðar í ár, og óivað høvdu um 100 fleiri teknað seg, um ikki eitt hægstamark hevði verið sett. Tí settu leiðararnir í ár sær fyri, at næsta ár verða tvær juniorlegur í mars, so nógv fleiri fáa møguleika at vera við.

Her eru nakrar myndir frá leguni, sum Lilja Súnadóttir Kristiansen hevur tikið.