Tá ið ein ógvusligur jarðskjálvti við styrki 7,7 rakti miðpartin av Myanmar tann 28. mars, legði hann eftir sær ræðuligar oyðileggingar – og fyri kristna minnilutan í landinum merkir vanlukkan dupulta forfylging.

Meira enn 2000 fólk lótu lív í jarðskjálvtanum og eftirskjálvtunum, og fleiri túsund fólk vórðu særd ella mistu hús síni. Millum tey, sum komu undan við lívinum, er Daw Sun, ein kristin einkja, sum ikki bert misti heimið í hesi vanlukku, men eisini stendur yvir fyri hóttanum frá einum stýri og einum samfelagi, ið ofta seta trúgvandi uttan fyri. Fyri kristin og aðrar minnilutar er hetta steinur oman á byrðu; eitt úrslit av harðligari religiøsari forfylging.

Eftirskjálvtar av forfylging mitt í vanlukkuni

Meðan kristin í Myanmar enn royna at fóta sær eftir jarðskjálvtan, møta tey eisini tí, sum kirkjuleiðarar kalla eina „dubulta forfylging.“ Tey skulu tola somu oyðilegging sum grannar sínir, men hava haraftrat byrðuna av áhaldandi kúgan frá hernaðarstýrinum og ógvusliga buddistiskum tjóðskaparfólki. Í einum landi við buddistiskum meiriluta verða kristin útihýst.
Keðiligar royndir vísa okkum, at tá altjóða neyðhjálp skal býtast út, enda kristin og aðrir minnilutabólkar aftast í røðini og fáa bert leivdirnar, eftir at øll onnur hava fingið sítt.

Tíverri tosa vit út frá royndum

Stýrið í Myanmar hevur søgu fyri at brúka neyðhjálp sum eitt vápn til at kúga etniskar og átrúnaðarligar minnilutar, sum ikki standa væl hjá teimum. Lokalar kristnar bygdir óttast, at myndugleikarnir og tjóðskaparligir bólkar beina hjálpina til búddistiska meirilutan ella øki, sum eru trúgv móti stýrinum, meðan kristin verða sett til viks. „Samfeløg, ið vilja vera reinbúddistisk, gera tað ómøguligt hjá kristnum familjum at liva,“ greiðir ein frágreiðing frá Open Doors frá. Sjálvt í einari slíkari vanlukku nýta summir ekstremistar høvið til at trýsta kristna minnilutan enn meira út á síðulinjuna.

Longu áðrenn hetta var Myanmar á 13. plássi á listanum hjá Open Doors yvir lond við mest forfylging móti kristnum. Nú hevur jarðskjálvtin bert gjørt støðuna verri. Christian Solidarity Worldwide vísir á, at „vanlukkan hevur økt um longu verandi religiøsa mismunin… minnilutar, ið frammanundan vóru systematiskt hildnir uttanfyri, uppliva nú enn størri avbjóðingar.“ Í stuttum sagt eru kristnu í Myanmar rakt bæði av oyðileggingini frá jarðskjálvtanum og órættvísu viðferðini, sum fylgir aftaná.

Hjálp og vón – kirkjurnar veita hjálp

Í hesi álvarsligu støðu eru lokalar kirkjur og kristin hjálpararbeiði millum tey fyrstu at koma við neyðhjálp. Open Doors – ein altjóða tænastuverkætlan, sum stuðlar forfylgdum kristnum – hevði frammanundan samstarvsfólk í Myanmar, sum arbeiddu í loyndum vegna ófriðin. Hesi vóru millum tey fyrstu at hjálpa oyðiløgdum kristnum samfeløgum við neyðsynjarhjálp eftir jarðskjálvtan.

Hesin jarðskjálvtin hevur avdúkað, hvussu bersøgin støðan hjá hesum fólkum er: grundin undir teimum er bókstaviliga rivin burtur, og samfelagið rundan um tey gevur teimum lítla trygd. Men mitt í hesi neyðstøðu liggur eisini ein møguleiki hjá altjóða kristna samfelagnum at sýna kærleika Krists. Við at svara við samkenslu og skund kunnu vit tryggja, at tey, sum annars ofta fáa bert leivdirnar av hjálpini, í staðin fáa umsorganina og stuðulin, sum teimum tørvar.

Starvsfólk hjá Open Doors í Myanmar heita á trúgvandi allastaðni um at biðja inniliga fyri landinum. Umframt bøn eggja tey eisini til ítøkiligan samhaldsfasta stuðul: „Okkara kristna familja her hevur tørv á mati, heilivági og troyst – men tey hava eisini tørv á at vita, at tey ikki eru gloymd.“

Nú er tíðin komin at heiðra og lyfta okkara trúføstu systkin. Mitt í oyðileggingini og mismununini standa tey í stórari neyð – og vit eru kallað at standa saman við teimum, bæði í kærleika og verki, til lovsongur teirra aftur kann rísa úr øskuni, skrivar OpenDoors Føroyar í tíðindaskrivi.

Hjálp okkum at hjálpa teimum í Myanmar.
Stuðla á 6460-605.816.9