Tá ið vit fara á val, standa vit ikki bert yvir fyri politiskum spurningum. Vit standa eisini við einum virðisgrundarlagi og eini samvitsku, sum – hjá mongum – er merkt av trúgv. Í eini undanfarnari grein sóu vit, hvussu Martin Luther lýsti tvey vald hjá Gudi: tað andliga og tað verðsliga valdið. 

Í stuttum: 

• Tað andliga valdið ber frelsuna fram og formar samvitskuna. 
• Tað verðsliga valdið verjir og skipar samfelagið. 

Í hesi greinini gera vit tað ítøkiligt: Hvat merkir hetta fyri veljarar, politikarar, prestar og myndugleikar – júst nú til løgtingsvalið? 

A) Ábyrgdin hjá tí kristna veljaranum 

• Bið og vel. Bið um vísdóm; vel við samvitsku og umhugsni. 
• Spyr inn til hugburðin handan politikkin. Hvussu hugsa tey um menniskjasýni, ábyrgd og rættvísi? Hvat liggur aftan fyri tey snøggu slagorðini og yvirskriftirnar? 
• Vel tað, ið ger næstanum væl. Hygg eftir politikki, ið styrkir felagsskapin og tekur atlit til tey, ið eru illa stødd. 
• Ver virkin í valkjakinum. Kanna fakta og tosa virðiliga við onnur – eisini á sosialu miðlunum. Ver sannleikanum trúgvur í kærleika. 
• Tak etiska støðu í torførum málum (t.d. fosturtøku). Lat trúnna og samvitskuna leiða teg, tá ið tú søkir greidleika í etiskum ivamálum. Spyr eisini valevnið, hvønn stuðul og hjálp samfelagið eigur at geva í svárum støðum í lívinum. 

B) Ábyrgdin hjá tí kristna politikaranum 

• Ver opin og heiðurligur. Lat virðini koma fremst – og lat taktikk og snildir koma í aðru røð. 
• Sí tína tænastu sum eitt kall. Politikarin tænir í vinstru hond Guds: til besta fyri felagsskapin og til gagns fyri tey menniskju, ið verða ávirkað av avgerðunum. 
• Ver sannleikanum trúgvur í kærleika. Vel tað rætta fram um tað lætta; tala av heilum hjarta, lurta rættvíst og vís virðing fyri menniskjum – serliga tá ið tit eru ósamd. 
• Virða mørkini. Trúgvin eigur ongantíð at verða nýtt sum trýstamboð, men sum ein kumpass til at tæna tí samfelagi, tú ert settur at umsita. 

C) Ábyrgdin hjá prestum og samkomuleiðarum 

• Boða Kristus – ikki flokspolitikk. Bið fyri øllum valevnum og teimum, ið valdið fáa. 
• Skapa rúm fyri samrøðu. Veit hjálp til etiska umhugsan við støði í tí, Gud lærir okkum í sínum orði. 
• Ger menniskju til lærisveinar. Tá ið vit vaksa í trúnni, læra vit at líkjast Kristi í gerandisdegnum. Soleiðis byggja vit besta grundarlagið undir felagsskapinum, ið kann bera okkum gjøgnum bæði góðar og svárar tíðir. 

D) Tann verðsligi myndugleikin 

• Verj frælsið – stýr ikki trúnni. Friðhalga trúarfrælsið; lat innihaldið í boðanini vera upp til høgru hond Guds, kirkjuna. 
• Skapa ytri skil. Syrg fyri friði og støðufesti, so menniskju trívast, og kirkjan kann virka frítt. 
• Lurta ábyrgdarfult. Tak ímóti samvitskuáminning kirkjunnar – uttan at gera kirkjuna til ein politiskan stovn. 
• Stýr atferð – ikki sannføring. Tryggja karmarnar fyri trúarfrælsi, skrivi- og talufrælsi; tak ikki ræðið á teologiini. 
• Samstarva í umsorgan. Kirkja og statur kunnu stuðla hvørøðrum í sosialum uppgávum, uttan at leiklutirnir verða blandaðir saman.