Heri Tróndheim, 1. apríl 1942 – 24. november 2025

Vit vilja við hesum bera eitt minningarorð um Hera Tróndheim – eitt so virkið, hjartagott og virðismikið menniskja – sum andaðist í vikuni.

Fyrst og fremst ynskja vit at bera eina tøkk fyri týdningarmikla arbeiðið, ið hann hevur luttikið í innan Kirkjuligu Heimamissiónina, og alt tað rúgvusmikla tilfarið, sum liggur eftir hann á so mongum økjum. Alt hetta peikar bert á tað, sum lá hjarta hansara næst og sum hann brann fyri: At onnur eisini mugu eiga Jesus sum sín frelsara.

Orð eru fátøk í hesum sambandi, nú ið vit ynskja at lýsa 83 ára langa lívið hjá Hera. Hann var altíð blíður og fyrikomandi, sakligur og semjusøkjandi, ágrýtin og trúfastur, vitugur og virkin.

Hetta fingu øll tey, sum komu at samstarva við Hera, at sanna, annaðhvørt tað var í nevnd, í tænastu innan kirkju, missión, á arbeiðsplássi ella í øðrum uppgávum í samfelagnum. Ella tá brúk var fyri hollari vitan í onkrum málsligum spurningi. Allir spurningar og allar avbjóðingar vóru møttar við einum brosi og einum verumáta sum segði, at hetta málið finna vit eina góð loysn á. Og so var.

Millum mongu álitisuppgávur og -størv hansara innan alt tað, sum lá hansara hjarta næst, er tíð hansara sum formaður í Heimamissiónini í 90’unum. Og hansara ídni fyri teimum smærru og kanska minni sjónligu uppgávunum, lá heldur ikki eftir. 

Var uppgávan stór ella var hon lítil, var tú ongantíð í iva um hansara greiðu fatan av, hvat var gott, hvat var neyðugt og hvat var satt.

Hansara sermerki á øllum økjum var røkjuskapur, hansara sakligheit og vilji at verkið, hvat enn tað so var, skuldi hava framgongd og bera á mál.

Virkið lív

Taka vit brot úr virkna lívinum hjá Hera, var hann lærari, limur í kommunustýrinum á Argjum eina setu, harav hann sat tvey ár sum formaður/borgarstjóri. Hetta kravdi sín mann, tí hetta vóru júst tey árini, tá ið Argja kommuna legði saman við Tórshavnar kommunu í 1997.
Hann sat eisini í kirkjuráðnum á Argjum frá tí tað var stovnað í 1978 til 1993, og frá 1985 sum formaður. Frá 1974 til 1992 var hann eisini limur í stýrinum fyri kirkju- og missiónshúsið á Argjum. Og hann var somuleiðis limur í høvðsstýrinum fyri Heimamissiónina frá 1994-1998, harav hann sat sum formaður í nøkur av árunum. 

Av øðrum týðandi uppgávum innan kirkju og missión er tænastan sum deknur og organistur í mong ár við Argja kirkju. Hann var ein av føstu organistunum, og legði fyrst frá sær, tá hann gjørdist 80 ár í 2022 . Hann var eisini fastur spælari, tá møti vóru hildin í kirkju- og missiónshúsinum. Húsið varð vígt 22. desember í 1974, og merkir tað, at Heri spældi her í sløk fimmti ár.

Áhugi hansara fyri sangi og tónleiki sæst eisini aftur í stóra talinum av sálmum og sangum, sum hann annaðhvørt hevur yrkt ella týtt til føroyskt. Í Missiónssangbókini hevur hann yrkt tveir sangir og týtt 17. Í sálmabókini hevur Heri týtt ein sálm. Umframt hetta hevur hann týtt ein hóp av sangum til kór og sangskeið.

Tá avgerð var tikin um at geva út nýggja sangbók fyri í 90’unum, var rættiliga sjálvsagt at Heri skuldi vera formaður. Missiónssangbókin, sum kom út í 1996 var gjørd í góðum samstarvi millum umboð fyri Heimamissiónina og Kirkjuliga Missiónsfelagið.

Hansara góða málsliga oyra kom eisini til sjóndar í útgávuni av ”Nýggja sáttmálanum”, sum kom út í 2017. Hetta var ein týðing av øllum bókunum í Nýggja Testamenti til eitt lættari føroyskt mál, og sum hann so hegnisliga greiddi úr hondum. Í fororðinum til Nýggja Sáttmálan taka tvey umboð fyri Føroyska Bíbliufelagið, ið gav bókina út, soleiðis til: ”Vit takka Hera Tróndheim fyri ótroyttiliga arbeiðið at týða og at lesa alt ígjøgnum – eisini aftaná, at so nógv (fólk) høvdu verið uppií. Takk fyri gott tol”.

Heri giftist Rigmor, fødd Hansen, av Argjum beint fyri ólavsøku, 25. juli, í 1965. Fyrsta árið búðu tey í Leirvík, til tey fluttu á Argir og bygdu beint við barnaheimið hjá Rigmor – nærindis gomlu bygdini. Seinni skuldi tað vísa seg, at tey eisini gjørdust næstu grannar við kirkju- og missiónshúsið á Argjum, har tey bæði eiga mong sporini í alskyns tænastum fyri teirra Harra og Frelsara.

Vit enda hesi minningarorðini við nøkrum ørindum úr Paulusar seinna brævi til Timoteus, kapittul 2, 6-8, soleiðis sum Heri umsetti tey í Nýggja Sáttmálanum:

“Mítt blóð kemur skjótt at renna, og nú er løtan komin at siga lívinum her á jørð farvæl. Eg havi bart hin góða bardagan, havi runnið strekkið, og eg havi hildið fast við trúnna á Jesus Kristus. Nú liggur sigurskransurin goymdur til mín, sum Harrin, hin rættvísi dómarin, vil geva mær hin dag. Lønina vil hann ikki bara geva mær, men øllum, sum leingjast eftir, at Jesus kemur aftur”.

Harrin troysti og styrki tykkum, ið sita eftir. Og æra verið minnið um Hera Tróndheim.

Vegna Kirkjuligu Heimamissiónina,

Heri Kjærbo, formaður, og Jákup Brúsá, aðalskrivari

Ein av mongu sangunum, sum Heri Tróndheim hevur týtt til føroyskt er Frá tí krossfesta frelsara. Í dag gav HMU Lovsangur út nýggja upptøku av vakra og vælkenda sanginum. Upptøkan er frá 17+ leguni í august.