Mikudagin 27. mai hevði høvuðsstýrið sín seinasta regluliga fund hesumegin summarfrítíðina.

Millum málini, sum vóru umrødd var fíggjarstøðan, fundurin við stýrini og stórmøtini 2020.

Fíggjarstøðan:

Orsaka av korona, so hevur Leguhúsið í Nesvík ikki verið útleigað síðani síðst í februar. Summarlegurnar eru eisini avlýstar, og hetta hevur sjálvsagt stóra ávirkan á inntøkurnar hjá Leguhúsinum. Høvuðsstýrið umrøddi málið, og hvat kann gerast fyri at skapa inntøkur til Heimamissiónina.

Tilber at lata eina gávu til Heimamissiónina við at flyta pengar á hesar kontur:

• BankNordik:                       6460-151.376.3
• Betri Banki:                         9181-497.550.4
• Norðoya Sparikassi:         9865-103.429.9
• Suðuroya Sparikassi:       9870-100.284.9

Eisini ber til at stuðla ymisku verkætlanunum hjá Heimamissiónini HER

Fundur við stýrini:

9. september verður árligi fundurin við stýrislimirnar í missións- og meinigheitshúsunum. Fundurin hevur áður einans verið fyri formenn og næstformenn, men í fjør vóru allir stýrislimir bodnir við á fundin. Høvuðsstýrið avgjørdi, at framyvir skulu allir stýrislimir í missións- og meinigheitshúsum verða bodnir við á hendan fundin. Fundurin verður sostatt ein fundur við stýrini. Høvuðsstýrið umrøddi, hvørji evni skulu takast fram á fundinum.

Stýrini fáa eisini møguleikan at koma við uppskotum til evni á fundinum. Ein innbjóðing til fundin verður send út einaferð áðrenn summarfrítíðina.

Stórmøtini 2020:

Í ár vera Stórmøtini hjá Heimamissiónini á Skála í døgunum 6. til 8. november. Ein fyrireikingarbólkur er settur at fyrireika stórmøtini, og bólkurin hevur havt sín fyrsta fund. Í bólkinum eru Asbjørn Mikkelsen og Anetta Kallsoy av Skála, Súni F. Olsen og Annelisa Rasmussen av Strondum. Jóhannus Mikkelsen umboðar LUN. Síðsti limur í fyrireikingarbólkinum er Dan Højgaard umframt aðalskrivaran Andrias Magnussen.

Fyrr í vár varð Ársmøtið útsett í óavmarkaða tíð. Hóast tilmælini eru broytt, so eru enn avmarkingar fyri, hvussu nógv fólk kunnu vera saman og hvussu tætt tey kunnu vera. Høvuðsstýrið avgjørdi tí at hava Ársmøtið leygardagin á Stórmøtunum.