Væl umtókti danski fyrilestrahaldarin Steen Palmqvist kemur aftur til Føroya í september 2024. Við sær hevur hann eina røð av fyrilestrum, ið venda sær til breiðan málbólk og taka støði í týdningarmiklum evnum sum barnauppaling, hjúnaband, kreppuhandfaring og relatiónir. 

Agape Føroyar, sum skipar fyri tiltakinum, hevur gjørt eitt miðvíst val um evnini, ið verða tikin upp á fyrilestrunum. Maja Jacobsen, samskipari hjá Agape Føroyar, greiðir frá: “Onkur av hesum evnunum eru vald, tí vit hava fingið áheitanir um júst hesi evnir, og onnur hava vit sjálvi valt. Vit ynskja at taka ymisk evnir fram, soleiðis at vit yvir eitt ávíst áramál hava nomið við so nógv viðkomandi evnir sum tilber.” 

Eitt fjølbroytt úrval av evnum 

Fyrilestrarnir fevna um evni, sum hava breiða undirtøku. “Vit vóna, at luttakararnir fara heimaftur við viðkomandi vitan og amboðum, sum gera tað lættari hjá teimum at loysa dagsins avbjóðingar í relatión við onnur menniskju,” sigur Maja Jacobsen. Hendan vitanin er ikki bara ætlað at hjálpa luttakarunum at skilja onnur, men eisini at geva teimum betri innlit í seg sjálvan. 

Steen Palmqvist, sum áður hevur búð eitt ár í Føroyum, hevur ment eitt serligt samband við landið, og hetta avspeglast í hansara fyrilestrum. Hansara djýpa innlit í føroyska mentan og náttúru ger, at fyrilestrarnir ikki bert eru djúpt hugvekjandi, men eisini serliga viðkomandi og gagnligir fyri føroyingar, sum leita eftir praktiskum amboðum til at loysa persónligar avbjóðingar. 

Agape Føroyar hevur síðan stovnanina í 1998 havt sum endamál at fremja kirkjuligt og sosialt arbeiði. Maja Jacobsen greiðir frá, at hetta er í tráð við virðisgrundarlagið hjá felagsskapinum, sum byggir á kærleika, nærveru, erligheit og virðing. Tiltakið við Steen Palmqvist er eitt av mongum, sum hevur til endamáls at stuðla hesum virðum og geva føroyingum nøktandi amboð til at skapa betri relatiónir og handfara kreppur. 

Tiltøkini eru ókeypis 

Øll fyrilestrartiltøkini eru ókeypis, men luttakarar hava møguleika at lata eina gávu til Agape Føroyar. Skráin fevnir um fýra fyrilestrar, sum verða hildnir í Skálavík, Skálafirði, Leirvík og Havn. Øll eru hjartaliga vælkomin til tiltøkini, og við góðari undirtøku frá undanfarnum tiltøkum, verður væntað, at hetta verður eitt væl vitjað tiltak. 

Skrá: 

• Hósdagin 12. sept. kl. 20.00: Børn, tørvur og avmarkingar (Brúgvin í Skálavík) 
• Fríggjadagin 13. sept. kl. 20.00: Kærleiki til seinasta eygnabrá (Keldan í Skálafirði) 
• Leygarmorgunin 14. sept. kl. 10.00: Tá kreppan rakar (Missiónshúsið í Leirvík) 
• Leygardagin 14. sept. kl. 16.00: Viðurkennandi relatiónir (Meinigheitshúsið í Havn) 

Við hesum fjølbroyttu evnum er ætlanin at geva luttakarunum amboð og vitan, sum kann gerast ein drívmegi í teirra persónligu menning og gerandisdegi.