Aftur til forsíðu

76 metrar høg Jesus-standmynd skal reisast í Meksiko

Mynd: Arcaion (lítla myndin: catholicspeakers.com)
"Christ the King" í Póllandi, sum higartil er heimsins hægsta Kristus-standmynd

76 metrar høg Jesus-standmynd skal reisast í Meksiko

Kristni Hollywood-sjónleikarin Eduardo Verástegui úr Meksiko, ætlar at reisa heimsins hægstu Jesus-standmynd í heimbýi sínum, Ciudad Victoria, í landspartinum Tamaulipas.

Tað skrivar The Christian Post. Eduardo Verástegui, sum er katolikkur, ætlar at kalla standmyndina “Christ of Peace” (Friðarins Kristus). Býurin Ciudad Victoria er ein av teimum vandamiklastu í Meksiko við meira enn 80 drápum fyri hvørjar 100.000 íbúgvar. Sjónleikarin vónar eisini, at standmyndin fer at draga fleiri ferðafólk til heimbýin.

Við sínum 76 metrum verður nýggja Jesus-standmyndin næstan tvífalt so høg sum “Christ the Redeemer” í Rio.
Eduardo Verástegui er bæði modell, tónleikari og sjónleikari, men tekur ikki við leiklutum, sum stríða ímóti hansara katólsku trúgv. Hann sigur eisini, at hann dagliga fer til messu, lesur í Bíbliuni, biður og skriftar minst einaferð um vikuna.

Aðrar kendar Jesus-standmyndir eru:

Christ the Redeemer í Rio er tann 5. størsta í heiminum. Hon er 30 metrar høg, men stendur á einum sokkli, sum er 10 metrar. Hon varð bygd í 1931.

Christ the King í Póllandi (myndin), sum higartil er heimsins hægsta, er 52 metrar høg. Hon er frá 2010.

Christo della Minerva stendur í kirkjuni Santa Maria Sopra Minerva í Róm. Standmyndin varð teknað av Michelangelo og varð liðug í 1521. Hon er bara tveir metrar, men er millum tær kendastu Jesus-standmyndirnar.

Christo de Concordia stendur ovast á San Pedro-fjallinum í Cochabamba í Bolivia. Standmyndin er frá 1994 og er 40 metrar høg. Ferðafólk sleppa at klúgva uppá hesa standmyndina sunnudagar.

Cristo Rei í Lissabon í Portugal varð bygd í tíðarskeiðinum frá 1959 til 1969. Sjálv standmyndin er 28 metrar høg, men hon stendur á einum sokkli, sum er 82 metrar høgur.

 

Kelda: Udfordringen

Viðmerkingar

Til ber at viðmerkja greinina við sakligum grundgevingum og sjónarmiðum. Ein góð minnisregla: Skriva ikki annað enn tað, sum tú kanst siga við ein persón andlit til andlits. Trúboðin loyvir sær at strika viðmerkingar, sum innihalda ljótan málburð, persónsálop ella haturstalu.

Undanfarna grein

Útbyggingin: Líður væl við høllini

Les grein

Enn eru pláss eftir til 60+dagin 23. mars

Les grein
Næsta grein
A+