Aftur til forsíðu

Miðskeiðsvalið í USA: Tveir statir táttaðu í møguleikan at fáa fosturtøku

Mynd: Craig Hudson

Miðskeiðsvalið í USA: Tveir statir táttaðu í møguleikan at fáa fosturtøku

Sum væntað og sum vanligt fekk miðskeiðsvalið til senatið og umboðsmannatingið í USA týsdagin stórt uppmerksemi um allan heim. Minni uppmerksemi fingu tær fólkaatkvøðurnar, sum summir statir hava samstundis sum miðskeiðsvalið. Berlingske.dk skrivar, at millum annað atkvøddu tríggir statir um mál, sum hava við fosturtøku at gera, og at úrslitið í tveimum teirra fall í góða jørð hjá teimum, ið eru ímóti fríari fosturtøku.

Í statinum West Virginia atkvøddi ein lítil meiriluti fyri eini lógarbroyting, sum merkir, at almenna heilsutrygdin einans rindar fyri fosturtøkur, um tær skyldast lívsvanda, neyðtøku ella blóðskemd. Í fjør rindaði almenna heilsutrygdin fyri knapt 1.500 fosturtøkur í statinum, endurgevur Berlingske.dk úr Los Angeles Times.

Í statinum Alabama atkvøddi ein meiriluti fyri eini stjórnarskipanarbroyting, so at staturin stuðlar og viðurkennir rættindini hjá óføddum børnum, fyrst og fremst rættin til lív.

Við hesum hava hesir báðir statir tikið eitt fet nærri einum forboði móti fosturtøku. Tó er rætturin til fosturtøku tryggjaður í eini hægstarættaravgerð frá 1973 (tiltikna Roe v. Wade). Men nú tað herfyri eydnaðist Donald Trump, forseta, at útnevna Brett Kavanaugh til hægstarættardómara, verður nú hildið at vera meiriluti ímóti fríari fosturtøku millum teir níggju hægstarættardómararnar í USA, tó at tað enn er óvist, um hesin meiriluti fer at gera nakað fyri at broyta avgerðina frá 1973.

Í statinum Oregon atkvøddu veljararnir ímóti einum uppskoti, sum skuldi forða teimum, ið eru undir almennari heilsutrygd, at fáa fosturtøku.

Viðmerkingar

Til ber at viðmerkja greinina við sakligum grundgevingum og sjónarmiðum. Ein góð minnisregla: Skriva ikki annað enn tað, sum tú kanst siga við ein persón andlit til andlits. Trúboðin loyvir sær at strika viðmerkingar, sum innihalda ljótan málburð, persónsálop ella haturstalu.

Undanfarna grein

Sanggudstænasta á Viðareiði sunnudagin

Les grein

Sunnukvøldið byrjar missiónsvikan í Miðvági

Les grein
Næsta grein
A+