Sum vársól rísur yvir fold

Herfyri fekk Trúboðin vitjan av Jan Jacobsen og Hanusi Thomsen, sum høvdu játtað at syngja og spæla tveir páskasangir fyri okkum. Í dag kunnu vit presentera hin fyrra av teimum báðum upptøkunum. Tað er sálmurin: Sum vársól rísur yvir fold. Videobrotið kanst tú síggja omanfyri hesa grein.

Sálmurin er eitt brot úr einari váryrking, sum Grundtvig upprunaliga yrkti sum ein kantata til eina páskagudstænastu í Christiansborg Slotskirke í 1846. Í yrkingini er vármorgun og blómandi náttúran við til at tekna eina mynd av blómandi ríki Guds. Tann blómandi vármorgunin verður knýttur saman við páskagleðiboðskapinum, men Grundvig blandar ikki tingini saman við at gera kristindómin til ein náttúruátrúnað. Gleðiligu náttúrulýsingar Grundtvigs verða stuðlaðar av vakra lagnum hjá Emil Hartmann, sum á sín serliga hátt ger mongu myndir Grundvigs livandi í síni yrking.

Í 1928 umsetti J. Dahl sálmin til føroyskt.

Sum vársól rísur yvir fold,
reis Jesus upp úr døkku mold
til lívs, so ei finst líki;
tí skal, alt meðan verøld stár,
nú eftir vetur koma vár
við gleði í Guðs ríki.

Sum fuglamongd í urð og líð
við fagnarljóði alla tíð
hin bjarta várdag boðar,
so tunga hvør, sum syngja kann,
lovsyngur deyðans yvirmann,
tá páskamorgun roðar.

Sum blómur allar fríðka jørð,
sum líðir grønkast, grasið grør,
tá lýkkan kemur blíða,
so blómar alt við Jesus Krist
til fólkagagns og gróðurs vist
nú, og sum tíðir líða.

Grundtvig 1846. J. Dahl 1928.
LES EISINI  Eg velji fyrr Jesus
Spurningar
Í løtuni eru ikki spurningar til greinina