Aftur til forsíðu

TiM: Tannáringar í Missión í Moldova og Albania

TiM: Tannáringar í Missión í Moldova og Albania

Eitt av fleiri spennandi tilboðum til ung, sum OM skipar fyri, er TiM, sum merkir “Teens in Mission”. Hetta eru toymisferðir fyri kristnar tannáringar í aldrinum 15 til 18 ár, og í ár verður aftur farið til tvey lond í Eysturevropa, Moldova og Albania.

TiM er tvær vikur í juli mánaði, og tað er lagt soleiðis til rættis, at til ber at fara beinleiðis til TeenStreet í Týsklandi aftaná, um ein hevur hug til tað. Tær tvær vikurnar á TiM eru fyrst upplæring í at breiða gleðiboðskapin út, og síðani at fara út við boðskapinum – outreach.

Endamálið er at tæna fólki í øðrum londum á ymiskan hátt, og hetta verður gjørt í samstarvi við kirkjur og samkomur á staðnum. Ofta taka TiM-toymi lut í ymiskum arbeiði fyri børn, og tey vitja eisini ofta fólk, sum eru illa fyri.

Fyrr hevur OM Føroyar millum annað skipað fyri TiM í Moldova, Albania, Bosnia og øðrum londum, og hesar toymisferðir hava verið til stóra signing, bæði fyri tannáringarnar sjálvar og fyri tey, sum teir hava verið í samband við. Filmsbrotið er frá TiM í Albania í fyrraárið.

Moldova og Albania

Í ár verða aftur tvær ymiskar toymisferðir at velja millum, til Moldova og til Albania, báðar ferðirnar eru í døgunum 13.-26. juli. Føroyskir leiðarar á ferðini til Moldova eru Kristina Foldbo úr Leirvík og Kristian á Lakjuni úr Klaksvík, og føroyskir leiðarar á ferðini til Albania eru Eyðgerð Nattestad úr Miðvági og Steffan Klein Poulsen úr Hvannasundi.

Ferðast verður umvegis Keypmannahavn, og prísurin verður væntandi um 8.000-10.000 krónur.

Smálutirnir eru ikki komnir uppá pláss enn, men ein fær meira at vita við at seta seg í samband við OM á info.fo@om.org Tekningin til TiM 2019 er eisini byrjað á heimasíðuni hjá OM Føroyum.

Viðmerkingar

Til ber at viðmerkja greinina við sakligum grundgevingum og sjónarmiðum. Ein góð minnisregla: Skriva ikki annað enn tað, sum tú kanst siga við ein persón andlit til andlits. Trúboðin loyvir sær at strika viðmerkingar, sum innihalda ljótan málburð, persónsálop ella haturstalu.

Undanfarna grein

Brasilsk vitjan á KFS-leguni næsta vikuskifti

Les grein

Fýra umsøkjarar til prestastarvið í Suðurstreymoyar norðara prestagjaldi

Les grein
Næsta grein
A+