”Og tá ið hann hetta hevði sagt, rópaði hann við harðari rødd: »Lázarus, kom út higar!« ”
Jóh.11,43

Jesus sigraði á deyðanum og er tí sigursharri og kongur deyðans. Tá Jesus nærkaðist fólki, ið vóru deyð, skakaðist hann í andanum. Hansara innara menniskja varð skakað. Hann kendi deyðan so nær sær, hann, sum ikki kendi til deyðan, tí hann var lívið.

Tá hann kom til Betaniu, var Lásarus deyður og lagdur í grøvina, og hann hevði longu ligið har í fýra dagar. Líkið dampar og er byrjað at rotna. Ein ramur deymur kemur út frá grøvini. Teir hava skumpað steinin og soleiðis lukkað fyri rivunum. Rot kemur rættiliga skjótt í lík í heitum londum, fýra dagar er nóg mikið.

Tá Jesus kemur til býin tyktist alt longu vera ov seint. Kvinnurnar komu honum ímóti og Marta sigur: ”… »Harri, hevði tú verið her, tá var bróðir mín ikki deyður.” Jóh.11,21 Tá svarar Jesus: ”… »Bróðir tín skal rísa upp.« ” Men tá tey komu til grøvina svíkur trúgv teirra tey, tí tá sigur Jesus: ”… »Takið steinin frá!« ” Luk.11,39 Soleiðis virkar kongur okkara.

Hann roynir trúgv okkara. Ger teg til reiðar! Fyrireika teg! Tak ímóti undrinum! Vænta tær eitthvørt, og ger teg til reiðar. Ger teg kláran til uppílegging Kongsins.

Hetta er tað einasta staðið, har tað stendur, at Jesus bað, tá ið hann framdi eitt undur. Tað var við grøv Lásarussar. Men hann bað soleiðis: ”… »Faðir, eg takki tær fyri tað, at tú hevur hoyrt meg. Eg visti fullvæl, at tú altíð hoyrir meg; men vegna mannamúgvunnar, sum stendur her rundan um, segði eg tað, fyri at tey skulu trúgva, at tú hevur sent meg.« Og tá ið hann hetta hevði sagt, rópaði hann við harðari rødd: »Lázarus, kom út higar!« ” Jóh.11,41-43

Ein prædikumaður hevur einaferð sagt, at um Jesus ikki hevði sagt: »Lázarus, kom út higar!«, men bert hevði rópt: ”Kom út!”, so vóru øll tey deyðu í Betaniu og har um leiðir komin upp úr grøvum teirra. Tað var sigursharri deyðans, ið rópti. Men ta ferðina var tað bert Lásarus, ið skuldi koma út, og tí segði Jesus: »Lázarus, kom út higar!«

Men Bíblian sigur, at ein dag fer tað at henda, at Kongurin skal koma aftur, og tá fer hann ikki at rópa: »Lázarus, kom út higar!«, men tá fer hann at rópa: ”Komið út higar!” til øll tey deyðu. ”… tí at tann stund kemur, tá ið øll tey, sum eru í grøvunum, skulu hoyra reyst hansara, og tey skulu ganga út, tey, sum hava gjørt gott, til lívs uppreisnar, og tey, sum hava gjørt ilt, til dóms uppreisnar.” Jóh.5,28-29

Kongurin kemur aftur, og tá skal hann ikki vera nøgdur við at kalla á Lásarus; men tá fer hann at siga: ”Komið út!” Og tey fara tá at koma út úr havinum, úr grøvunum, frá hermótinum, frá fjøllunum og úr dølunum, har menniskju liggja grivin. Tey koma út, tí hann er Kongur deyðans og tey skulu dømast á tí stóra Dómadegi.
Effie Campbell umsetti