Tveir fótbóltsdystir í vikuskiftinum
Vit í heimamissiónini eiga nógv dugnalig og ágrýting ung fólk, ið bera ungdómsarbeiðini runt um í Føroyum. Serliga stuttligt er tað, tá arbeiðini møtast og skipa fyri tiltøkum saman.
Í vikuskiftinum eru tveir fótbóltsdystir á skránni. Endamálið er at samansjóða tey ungu í álvara og gaman.
Upprunin
Fyri einum ári síðani sendi ungdómurin í Missiónshúsinum á Strondum eina avbjóðing yvirum fjørðin. Tey bjóðaðu Tofta fólki av í fótbólti og Tofta fólk tóku av.
17. juni 2023 var dysturin spældur, sum eftir straffikapping endaði við einum sigri til Tabor á Toftum.
Dysturin eydnaðist væl, og var hetta ein sera góður háttur at samansjóða ungdómsarbeiðini í heimamissiónini.
Leygardagin verða tveir dystir
Aftur í ár skipa ungdómarnir fyri fótbólti, men hesaferð eru tveir dystir!
Á Strondum: Missiónshúsið á Strondum møtir Glóð (Gøtu)
Á Strondum byrjar ungdómsmøtið í missiónshúsinum klokkan 20.00 við Petur Suna Jacobsen. Eftir møtið fara øll niðan á vøllin, har tað verður dystur og okkurt gott til matna.
Á Svangaskarði: Tabor (Toftir) spælir móti Salt (Meinigheitshúsið í Havn)
Á Toftum byrja tey uppi á Svangaskarði klokkan 20.00, har Marjan Kass Nielsen hevur eina andakt. Eftir andaktina er dystur og aftaná dystin verður grill og hugni í Tabor.