Heimamissiónin heiðrar Berg D. Joensen fyri sítt stóra arbeiði fyri kirkju og missión

Símun P. Jacobsen, formaður í Kirkjuligu Heimamissiónini, talaði á ungdómsløtuni á stórmøtinum í høllini á Hálsi í Havn í kvøld. Í talu síni nam hann millum annað við hetta at bjóða seg fram til at vera virkin í tí, sum er gott og uppbyggjandi og tænir øðrum, og samstundis seta sítt egna til síðis.

Eftir taluna bað Símun Berg Debes Joensen, sóknarprest, koma upp á pallin, har hann takkaði Bergi fyri hansara stóra og ótroyttandi ídni heilt frá blaðungum árum til frama fyri kirkju og missión. Bergur hevur verið virkin og givið sítt heilt stóra íkast í sera nógvum ymiskum andligum arbeiði, og soleiðis er tað enn.

Síðani handaði Símun Bergi ein vakran málning, meðan lógvabrestirnir rungaðu í høllini frá stóru ungdómsfjøldini – tí tey ungu kenna eisini Berg. Málningin hevur Hilmar J. Højgaard málað og hann avmyndar – ikki so lítið sigandi – fótatváttin í Jóhannes evangeliinum 13. kapittli. Júst fótatvátturin er ímyndin av lærusveinaskúlanum Podas, sum Bergur hevur stovnað og leiðir. Podas merkir júst føtur.

LES EISINI  NÚ ER KLÁRT AT TEKNA SEG TIL PODAS 2022-2023
Spurningar
Í løtuni eru ikki spurningar til greinina