Í Norra er fráskiljing av óføddum børnum við Downs syndromi aftur komið til politiska viðgerð, skrivar danski felagsskapurin Retten til Liv á facebooksíðu síni. Tað var prísurin, sum norski forsætisráðharrin mátti gjalda fyri at fáa Kristiliga Fólkaflokkin framhaldandi at stuðla stjórnini.

Kjakið er heitt, og kvinnurørslan í Norra er longu farin út á gøtuna og hevur boðað frá fleiri stórum mótmælisgongum ímóti eini og hvørjari skerjing í fosturtøkulógini.

Í hesum sambandi hevur ein pápi at einum drongi við Downs syndromi skrivað eina kronikk á heimasíðuni hjá NRK. Tí hetta kjakið er náðileyst og harðligt fyri tey, sum alt snýr seg um – børnini við Downs syndromi og familjur teirra.

Pápin gevur hesi fimm góðu ráð til teirra, ið luttaka í kjakinum:

1. Set teg inn í tað, sum tú tosar um (til dømis vísa kanningar, at menniskju við Downs syndromi hava størri nøgdsemi og eydnu enn onnur. Hvussu ofta verður sagt frá tí?)
2. Brúka fordómsfrí orð
3. Ver forvitin eftir at vita, hvat mótparturin heldur
4. Arbeið ímóti fordómum og mismuni móti fólki við Downs syndromi
5. Góðtak ikki bara tað verandi